'பொதெம்கின்' - 'டைட்டானிக்' : வரலாற்றுக் கப்பலும் வரவுக் கப்பலும்

'டைட்டானிக்'கின் வரலாறு இயற்கையினாலும். நாகரீகச் சமூகத்தினாலும் 1500 பேர் கொல்லப்பட்ட ஒரு விபத்து; பொதெம்கின், சுரண்டலமைப்பை மாற்றத் துடித்த ஒரு புரட்சியின் குறீயிடு. விபத்து என்ற உண்மையில் ஆதி கால அம்பிகாபதி - அமராவதி காதல் கதையைக் கலந்தது இயக்குநர் காமரூனின் கற்பனை; தோல்வியுற்ற பொதெம்கின் கலகம் என்ற உண்மையில், எதிர்காலப் புரட்சியின் வெற்றியைக் கலந்தது இயக்குநர் ஐசன்ஸ்டீனின் கற்பனை.

..

ரோஸ், ஜாக் என்ற அழகான காதலர்கள்தான் 'டைட்டானிக்'கின் பாத்திரங்கள்; உழைத்து ஒடுங்கிய முகங்களை கொண்ட வீரர்களும், கொடுமை கண்டு கோபம் கொண்ட மக்களும்தான் பொதெம்கினில் வந்தார்கள்.

..

நூற்றுக்கணக்கான தொழில்நுட்பக் கலைஞர்களும் செலவழிப்பதற்குப் பெரும் நிறுவனங்களும் காமரூனுக்கு இருந்தார்கள்;கப்பலில் உயரும் செங்கொடி மட்டும் சிவப்பில் வர எல்லா மூலப்பிரதிகளிலும் தானே வண்ணம் தீட்டிச் சேர்த்தார் ஐசன்ஸ்டின்.

..

'டைட்டானிக்'கின் விபத்தை அழகுபடுத்த சிறப்பு ஒலி,ஒளி, கணிப்பொறி வரைகலை, திரையரங்கச் சிறப்பு உபகரணங்கள் இருந்தன; பொதெம்கினின் கரடு முரடான கலகத்தை, கருப்பு - வெள்ளையும் உரையாடல் இல்லாத இசையும் கம்பீரமாகக் கொண்டு வந்தன.

'டைட்டானிக்'கின் புகழ் பாட உலகெங்கும் பத்திரிக்கைகளும், தொலைக்காட்சிகளும் இருக்கின்றன; பொதெம்கினைத் தடை செய்வதற்கு ஐரோப்பிய ஆட்சியாளர்களும், அவதூறு செய்யப் பத்திரிக்கைகளும் முயன்றனர். 'டைட்டானிக்'கின் தொழில் நுட்பப் பிரமிப்பிலும் காதலின் மயக்கத்திலும் கட்டுண்டு மெளமாகக் கனவு கண்டார்கள் ரசிகர்கள்; படத்தின் தேவையான வசனங்களைத் தாங்களே பேசி, புரட்சியின் எழுச்சியை அரங்கினுள் கொண்டு வந்தார்கள், பொதெம்கினின் ரசிகர்கள்.

'டைட்டானிக்'கின் பிரம்மாண்டம் திரைக்குள் மட்டும் இருந்தது. பொதெம்கினின் பிரம்மாண்டம் திரைக்கு வெளியே இருக்கிறது. 'டைட்டானிக்'கின் சாதனை அதன் செலவு மதிப்பீட்டில்; பொதெம்கினின் சாதனை நமது வாழ்க்கையை மதிப்பிட்டதில்.

..

'டைட்டானிக்'கினால் அடித்துச் செல்லப்பட்ட ரசிகர்கள் வாழ்க்கைக் கரையேறுவதற்கு ; "போர்க்கப்பல் பொதெம்கினைப்" பார்க்க வேண்டும், ஒரு முறையாவது.

ஜூலை 1998 புதியகலாச்சாரத்தில் வந்த இதன் முழு விமர்சனமும் கீழே க்ளிக் செய்து படிக்கவும்.

**********************************************************************************************

http://i211.photobucket.com/albums/bb46/puthagapiriyan1/battleshippotemkin1.jpg

http://i211.photobucket.com/albums/bb46/puthagapiriyan1/battleshippotemkin2.jpg

http://i211.photobucket.com/albums/bb46/puthagapiriyan1/battleshippotemkin3.jpg

http://i211.photobucket.com/albums/bb46/puthagapiriyan1/battleshippotemkin4.jpg

http://i211.photobucket.com/albums/bb46/puthagapiriyan1/battleshippotemkin5.jpg

"பேலட் ஆஃப் எ சோல்ஜர்" - ரஷ்யத் திரைப்படம்

போர்க்காலத்தில் ரானுவத்தில் இருக்கிற இளைஞன் ஒருவன், கிடைக்கிற சில நாள் விடுமுறையில், தன் அம்மாவை பார்த்துவிட வேண்டுமென்று வெகு தொலைவில் இருக்கிற ஊர் நோக்கி கிளம்புகிறான்.அவனது பயணத்தின் வழியே அவனது கதையையும், போரின் தாக்கத்தையும் சொல்லும் கதைதான் "Ballad of a Soldier"

இத்திரைப்படம் 1959 ல் வெளிவந்தது. இதன் இயக்குநர் கிரிகோரி சுக்ராய் .உக்ரேனிய நாட்டை சேர்ந்த இவர் படத்தின் கதாநாயகனை போல போர்வீரர்தான். இரண்டாம் உலக போரில்.

இந்த வார ஆனந்த விகடன் இதழில் உலக சினிமாவில் இத்திரைப்படத்தினை பற்றி எழுதியதை படித்த பின் நெட்-ல தேட யூ டூபிப்-ல் முழுதிரைப்படத்தையும் பார்க்கும் வாய்ப்பு கிடைத்தது.

ஒரு தாய் போருக்கு சென்ற தனது மகனை எதிர்ப்பார்த்து காத்திருப்பதில் இருந்து படம் ஆரம்பிக்கிறது.இந்த தாயின் மகனான அல்யோஷா என்கிற போர்வீரன் தான் கதையின் நாயகன்.

போர்களத்தில் நிகழ்த்திய சாதனைக்காக பதக்கம் அளித்து பாராட்டுவதாக ஜெனரல் சொல்ல , அதற்கு பதிலாக ஒரு நாள் விடுமுறை கொடுங்கள் , நான் எனது ஊர்க்கு சென்று என் அம்மாவை சந்தித்துவிட்டு வருகிறேன் எனக் கேட்கிறான். போருக்கு வரும் பொழுது அம்மாவிடம் சொல்லாமல் வந்துவிட்டதையும், இறுதியாக அம்மா எழுதிய கடிதத்தில் குடியிருக்கும் வீட்டின் கூரை ஒழுகுவதாக கூறி இருந்ததையும் சொல்கிறான் அல்யோஷா.

இறுதியில் சம்மதிக்கும் ஜெனரல், போர்காலம் என்பதை கணக்கில் கொண்டு போவதற்கு 2 நாளும், வருவதற்கு 2 நாளும் எடுத்து கொள் என சொல்லி, கண்டிப்பாக அதற்குள் விடுமுறையை முடித்து வந்து விட வேண்டும் என சொல்கிறார்.உற்சாகமாக் , சரி என சொல்லிவிட்டு அல்யோஷா ரயில் ஏறுகிறான்.

இடையில் ரயில் நிறுத்ததில் தனது அம்மாவுக்கு அழகிய கம்பிளிதுண்டு ஒன்றை வாங்கி கொள்கிறான்.இதன் பின் அல்யோஷா பயணத்தில் ஏற்படும் நிக்ழ்வுகள் தான் மொத்த திரைப்படமும்.

ஷீரா என்கிற பெண்னை இரயிலில் சந்தித்து மெல்லிய நட்பாக ஆரம்பிக்கிறது. பின்னர் இடையில் ரயிலை தவற விட்டுட்டு தவிப்பது பின் மீண்டும் சந்திக்கும் போது வலுவான ஒரு தாக்கத்தை இருவரும் உணர்வது என காட்சிகள் நகர்கிறது. பின் பிரிய வேண்டிய சூழ்நிலையில் தனது முகவரியை அல்யோஷா ரயில் சத்ததோடு கத்தி சொல்கிறான்.

பின்னர் அவன் பயனம் செய்யும் ரயில் செல்லும் பாதையில் பாலம் வெடிகுண்டால் தகர்ந்து விடுகிறது. அடுத்த ரயில் வர இன்னும் இரண்டு மணி நேரம் ஆகும் என அறிவிப்பு வர...விடுமுறை முடியும்தருவாயில் "காத்திருக்க முடியாது" என நடந்தும்; ஓடையை கடந்தும் வந்து ஒரு வண்டிக்காரனின் உதவியோடு ஊருக்கு வருகிறான் அல்யோஷா

.அம்மாவை தோட்டத்தில் சென்று சந்திக்கும் அல்யோஷா , தாயை பாசத்தோடு கட்டிணைந்து தான் அம்மாவுக்காக வாங்கிய கம்பிளி துண்டை தருகிறான்.பின்னர் உடனே கிளம்புவதாக அல்யோஷா கூற அம்மா முதலில் போக விட மாட்டேன் என அழுவாள். பின்னர் "நீ விட்டுக்கு திரும்பி வர்ற வரைக்கும் நான் உயிரோடு இருப்பேன். உனக்காக காத்துக்கிட்டுருப்பேன்" என்று சொல்லி தன் மகனை முத்தமிடுகிறாள்.

அல்யோஷா கண்கள் கலங்க முத்தமிட்டுவிட்டு, கையசைத்துக்கொண்டே திரும்பி வாகனத்தை நோக்கி ஓடத் துவங்குகிறான். நீண்ட மண் பாதையில் கிளம்பிச் செல்லும் வாகனம், புழுதிப் புகையில் மறைகிறது.

இது தான் இத்திரைப்படத்தின் கதைச்சுருக்கம். இதனை படிக்கும் போது ஏற்பட்ட உணர்வை விட பன்மடங்கு உணர்வு திரையில் பார்க்கும் போது ஏற்பட்டது.இடையில் கால் ஊனமான ஒரு போர்வீரனை சந்திப்பது அவன் தனது மனைவியை சந்திக்க விரும்பாமல் விலகுவதும்,சக போர்வீரன் தனது வீட்டுக்கு பரிசாக கொடுக்க ஏதும் இல்லாமல் சோப்பு கட்டியை கொடுத்துவிடுவதும்; மிக உணர்ச்சிபூர்வமாக எடுக்கப்பட்டு உள்ளது...

"வீரம் விளைந்தது" என்கிற நாவல் படித்து கொண்டு இருக்கும் சமயத்தில் இத்திரைப்படத்தை பார்த்தேன். நாவலின் பாவெல் எவ்வளவு துன்பங்களுக்கும் மத்தியில் தொடர்ந்து செம்படையிலிருந்து எதிரிகளோடு போராடுவது, தொடர்ந்து ரானுவத்தில், மக்கள் பணியில் இருக்க விரும்புவது; ஒரு கம்யூனிஸ்டாக வாழ்வது என சித்தரிக்கப்பட்டு இருப்பான்.

போர்க்களத்தினை மையமாக கொண்ட இந்த நவால் படிக்கும்போது இத்திரைப்படத்தினை பார்த்ததால் அல்யோஷா கதாபாத்திரத்தையும், போர்காலக்கட்டத்தையும் மேலும் உள்வாங்கிக்கொள்ளமுடிந்தது.

நாவலை இன்றுதான் வாசித்து முடித்தேன். பாவெல் கதாபாத்திரம் நினைவுகளில் இருந்து அகல மறுக்கிறது. அந்த வீரனை திரையில் பார்த்த மாதிரி அல்யோஷா காட்சிகளும் நினைவுகளில் இருந்து அகல மறுக்கிறது.

"Ballad of a Soldier" திரைப்படத்தின் முழுமையாக யூ டூபில் இணைத்துள்ளவருடைய முகவரி கிழே உள்ளது.

http://www.youtube.com/user/overture88